今日搭巴士返工，上到車先知八達通無錢，而銀包有一張500蚊，但架巴士已經開咗。
呢刻我尷尷尬尬喺書包到搵下有冇散銀，最後發現一封利是，以為好好彩，點知打開先知係50蚊人民幣。
我死死氣問司機:「唔好意思呀，我八達通無錢......我得張500蚊。」
司機望一望我，然後講咗一句:「搵其他人唱錢。」
我見司機睇嚟無空間比我走數嘅餘地。(你估司機係你讀者肯比你狂走數咩)
於是望一望車入面嘅人，可能佢地知我無錢搭車，好多人雙眼都避開視線唔同我接觸，好似唔想比老師點名答問題咁。我吞一吞口水，慢慢行去佢地面前，但當我見到佢地個樣都唔忍心走去問佢地唱錢，同埋500蚊對佢地嚟講又真係幾難唱比我......
後來有個女仔上車，我見佢個樣好似比較易話為，於是大膽咁提出:「小姐，我無錢搭車，但我有張50蚊人民幣，不如同你換10蚊......」
呢個女仔望一望我，就話唔洗交換，直接比10蚊我搭車。呢刻我諗起之前比人昆咗唔少「搭車借錢黨」，會唔會佢都當我係呢類人呢? 於是我就話:「不如我當借住先，之後還比你好嗎?」
女仔堅決話唔洗，我都無謂逼佢。但我終於解決咗搭車柒事。
之後由於車入面已經無位坐，個女仔喺我眼前，我心入面就有條刺，我覺得我係應該要還返10蚊比佢，個女仔無啦啦搭程車就無咗10蚊，雖然係小數目，但係......我個心又有啲過意唔去。
眼見我就快到站，我仍然無勇氣開口問佢電話，好讓我還返錢比佢，內心仍然有好多顧慮，例如再問佢嘅話會唔會當我想溝佢呢?! 會唔會覺得我好煩膠呢?! 會唔會佢覺得10蚊真係好小事呢?!
當我諗下諗下......我已經到站了。而我仍然無勇氣問佢拎電話，剎那間，一個小小嘅遺憾就出現咗我人生之中。
* 落車後，唔知邊到嚟嘅勇氣，我轉身即刻上返車，呢下舉動好似嚇親佢咁，佢呆呆咁望住我，身邊嘅乘客都帶住奇怪目光望住呢個無啦啦轉身上返車嘅人......
我鼓氣勇氣同呢個女仔講:「可唔可以比你個電話號碼我? 我想還返呢10蚊比你。」
個女仔表情有點錯愕，然後展露笑容說:「好好好......我比你。你之後再Whatsapp返我。」接著就比咗電話號碼我。
我緊握手上嘅電話，心入面即刻放鬆落嚟，因為遺憾已經解決了。後來個女仔篤一篤我，佢問:「你係咪頭先個站要落架? 咁你陣間咪要行好遠先返番去?」
我嗰下先醒起我無落車，個女仔笑說:「比多10蚊你搭返去，咁你就差我20蚊。」
嗰刻我好似見到呢個女仔發光咁，心入面竟然動咗一下凡心......
後來告別後，我地一路Whatsapp，開始傾下大家背景呀，住邊呀!
佢問我有冇女朋友，我話無呀! 點知佢話:「哈哈! 咁我咪有機會囉~」
我都唔執輸，即刻回佢:「你咁答法~我都有機會做你....嘿嘿!」
突然間關係好似變得超好，睇嚟我地會有發展嘅可能性......
《完》
頭十一段係真事嚟，由 * 開始就係FF。
BTW 感謝今日比咗10蚊我搭車嘅你，如果唔係我真係柒到地裂。
Search